اثناء تجوالي على بعض المواقع اللليبية ( موقع المنارة ) قرأت قصيدة باللهجة العامية للشاعر نعيم الزوي عنوانها (ياثايرة عالظلم مية مرة) موجهة الى مدينة بنغازي فأردت ان اعلق عليها فجاءت هذه الكلمات :
انتي الفلة
وانتي عبير الوطن فيك تجلى
يوم ما نهضت عالظلام وظله
ناضت ربوع الوطن كله كله
وراك ثايرة عالحق ماتتخلى
انتي ترسمي وهم يتبعوا
في الجرة
انتي الزينة
صبرتي على وقت الشقا وسنينه
وحملتي الظروف الباهية
والشينة
ولما وقفتي كلنا صبّينا
معاك ما تخاذلنا ولا ولّينا
وفي فصول مدرستك العز اتقرّى
انتي اللي جمّعتي
شرقي وغربي ومن الجنوب
صنعتي
نسيج وطننا وريحة الحب
زرعتي
مابينهم والعهد ماضيعتي
ماتسيبي بعد ما صبحتي حرة
ماتسيبينا انحوس
واحد يقتّل خوه يبّي فلوس
والاخربيقطع ليبيا بالموس
وواحد امجنّد محكمة واحبوس
الله يحفظك ياليبيا من
شرّه
وهذي القبايل ثارها المدسوس
تبي تاخذه قبل المسا مايدوس
طرف النهار يشيل كامي سره
ماتسيبينا ثانية ولادقيقة
بعد ما فتحتي الباب ومغاليقه
باب عزّنا ودرب الوفا وطريقه
نمشوه ملمومين وانت الصرّة
نمشوه مشي ارفاقه
لخير ليبيا ولعزها سباقة
راه دربنا مليان بالحسّاد والسرّاقة
وبفاسدين الراي واللقافة
تركة سنين الاربعين المرّة
يبوا يقطعوا من الوطن حلو
مذاقه
يبوا يقسموه ويرتعوا
في برّه
نبوك بنغازينا
زي وقفتك يوم سبعطاش تجينا
جية الفزّاعين يوم الشينة
انردوا مهابة ليبيا المسكينة
وانمدوا عليها قلوبنا وايدينا
وكل من طمع يرجع بخايب شره
زي وقفتك يوم سبعطاش تجينا
جية الفزّاعين يوم الشينة
انردوا مهابة ليبيا المسكينة
وانمدوا عليها قلوبنا وايدينا
وكل من طمع يرجع بخايب شره
رائعة جداً جداً جداً
ردحذفآمل أن تنشرها في أماكن أخرى