منقول من مدونة شوف شغلك
أي واحد فينا بيحاول دايماً يزود إنتاجيته عشان يحقق نتايج أحسن في شغله، لكن محاولاتنا لزيادة الانتاجية ممكن تقابلها أخطاء معظمنا بيقع فيها بدون وعي وبتكون نتيجتها عكسية.
1- غياب الرؤية
نتيجة ضغط الشغل بنلاقي إننا بنحاول نعمل حاجات كتير في وقت قليل.. بنغرق في جداول وخطط معقدة عشان ننظم وقتنا بس في وسط كل ده بننسى إحنا ليه أصلاً بنعمل كل ده؟
مهم إنك تكون كفء في شغلك بس الأهم إنك تكون كفء ومؤثر كمان.. وده يكون بإنك تركز على جدوى المهام اللي بتقوم بيها قبل ما تقرر إنك تعملها.
2- تعدد المهام في نفس الوقت
أو ما يعرف بال multitasking لدرجة إن الناس عندها تصور إن الشخص اللي يقدر يتكلم في التليفون ويبعت إيميل ويكون بيتابع حاجة في التليفزيون في نفس الوقت هو أكتر إنسان منتج.. وده مش حقيقي لإن كل الأبحاث أثبتت إن عقل الإنسان بيشتغل في أكثر من عملية على التوالي مش على التوازي.. بالتالي محاولة إنك تعمل أكتر من حاجة في نفس الوقت هيؤدي إلى تشتيت تركيزك مش زيادة إنتاجيتك.
3- استخدام أدوات معقدة
أحياناً بتظهر تطبيقات تساعدك على تنظيم وقتك.. أو برامج هدفها زيادة الإنتاجية.. دي حاجات مفيدة بشرط إن استخدامها يكون وسيلة مش هدف.. لإن كل انسان عنده منحنى تعلم ومع الوقت قدرته على استيعاب أدوات جديدة بتقل.. ممكن تضيع وقت كتير عشان تتعلم تطبيق جديد رغم إنك لو استخدمت الوقت ده في شغلك كنت هتحقق نتايج أسرع وأحسن.
4- الدخول في مشاريع كتير
“إحنا بننفذ أي مهمة بنجاح تام”.. دي البداية اللي بتخلي أو شخص أو مجموعة تكون عندها رغبة على إثبات المزيد من النجاح.. ممكن يوصل لمرحلة تحدي الذات أو إدمان النجاح.. مهم جداً إن قبل ما نقرر الدخول في مشروع جديد إننا نتأكد إن عندنا الوقت والمقدرة على تنفيذه.. عشان لو ده مش موجود هتكون النتيجة تأخير في باقي المشروعات وممكن يأثر على جودة الشغل.
5- قلة النوم
معظم الناس اللي بيحاولوا زيادة انتاجيتهم مش بيقدروا أهمية النوم.. الحل البسيط للمشكلة دي إنك تتعامل مع النوم على إنه مشروع إنت مسؤول عن تطبيقه وتدخله في جدول أعمالك. من غير عدد كافي من ساعات النوم الإنتاجية هتقل مهما حاولنا نضغط على نفسنا.. وطبعاً الآثار الصحية الإيجابية للنوم معروفة لكل الناس
مهم جداً إننا نحاول نزود إنتاجيتنا.. والأهم إننا نعمل ده بطريقة تحافظ على صحتنا وعلى التوازن الإجتماعي في حياتنا لإن الانسان الناجح هو اللي بيقدر ينجح في كل جوانب حياته.
ليست هناك تعليقات:
إرسال تعليق